نصائح لمحجبات لعمل لفات طرح

نصائح لـ المحجبات لعمل "لفات طرح"
===============

اولا : خامات الطرح

لازم تهتمي انك تعرفي ان لكل فصل من فصول السنة خامة ، يعني في فصل الصيف ممكن نلبس الطرح الأقطان الخفيفة والشيفون.. وفي فصل الشتاء نلبس الطرح القطن الثقيلة شوية وهي موضة جدا السنة دي، أما الأورجانزا والتول والشيفون فممكن نلبسهم أكثر السهرات والسواريه.


ثانيا: اشكال الطرح

الألوان المتداخلة مازالت موضة والطرح المنقطة و اللي فيها كور موجودة بكثرة وكمان المقلمة..والموضة السنة دى هي الطرح الساتان ومعظم الخامات دلوقتي فيها لمعة وممكن نلاقي اللمعة الفضي والذهبي مع بعض، يعني مثلا تلاقي القماش كورأحمر وأسود وفيه لمعة فضي أو ذهبي ولون رصاصي وفيه لمعة فضي وكمان

معظم البنات كانوا متخوفين إنهم يلبسوا الطرح اللي بتلمع في النهار لكن الان أصبحت موضة .



ثالثا: لفات الطرح لاخفاء عيوب الوجه


البنت وجهها طويل :يبقى تحاول تعمل الطرحة لتحت في اتجاه الخلف أو على جنب، وبعدين تقصر الجبهة وتضيف أي حاجة على الجانب علشان الوجه يبين إنه عريض.

و إن الوجه الطويل لا يتناسب معاه الربطة العالية لأنها هتطوّل الوجه أكثر.


بنت وجهها مدوّر: يبقى بلاش تلف الطرح على جنب إطلاقا لأنها تزيد من مساحة (الخدود) وتعمل الطرحة للخلف، لتحت أو لفوق، وممكن تعمل الطرحة شينوه لفوق، وممكن تعمل الربطة ديل حصان لفوق علشان الوجه يكون رفيع.


والوجه المربع أو المستطيل :الوجه المربع والمستطيل بيكون عنده أربع بذور، اثنتين في الجبهة واثنتين في الفكين و لازم تنزل بالطرحة لتحت شوية ونعمل (كروس) طرحة عكس الثانية

والطرحة بتساعد إن الوجه يكون رفيع وتحاول تداري الجبهة وتحاول تنزل بالطرحة على الجبهة وتقفل الجبهة.

والوجه البيضاوي:.معظم الربطات تمشي معاه وممكن تعمل ربطة على جنب أو تقفل من قدام أو تعمل كروس.

الوجه ذو الأنف الكبير:صاحبة الأنف الكبير بيكون عندها مشكلة في الحجاب لأن أنفها ظاهر وواضح في الوجه وفي هذه الحالة ماينفع معاها إننا نعمل إسبانش للخلف أو طرحة هابطة وماسكة على وجهها .. فتحاول إنها تلبس طرحة منفوشة شوية أو تضع إكسسوار أو تعمل أكتر من طبقة أو تدخل أكثر من بندانة علشان تخطف العين ولا تجعل التركيز على أنفها.

الشفايف كبيرة : نفس الشئ تحاول تلفت النظر بأي شيء يبعد التركيز عن وجهها وتعمل ماكياج كثير على عينها والطرحة تكون منفوشة وتغير في الربطات والألوان.


رابعا: البنات ولفات الطرح المناسبة للجامعة

ربطة الطرحة لازم تكون بسيطة وخفيفة فممكن تستخدم طرحة أو طرحتين على الأكثر.. يا ريت تحاول تبعد عن الألوان الكثيرة وتكون رقيقة على قد ما تقدر وتبعد تماما عن التول والأورجانزا.


والبنت لازم دائما تهتم فى لبسها فلو مثلا لابسة حاجة سادة يبقى ممكن الطرحة يكون فيها ألوان، لكن لو لابسة حاجة ملونة أو فيها نقوش يبقى لازم الطرحة تبقى سادة.

وممكن البنت تنوع في شكل ربطة الطرحة وهي رايحة الجامعة فممكن إنها تعمل ربطة إسبانش، بس تاخد بالها إنها تلفها مثل الدائرة وتجيبها لامام ، واذا ماتحب فممكن تعمل إسبانش يبقى تربطها عادي بطرحة أو طرحتين أو طرحة وبندانة.