بدون تشطيب
كتب على سلامة ١/ ٢/ ٢٠٠٩
من أهم قرارات
مؤتمر القمة العجيب
إن الدنيا غدارة
وكل من عليها فانى..
ويتم إعادة إعمار عزة
بس بدون تشطيب
على أساس إنها ها تنضرب تانى..
وانتهاء عصر
أنا وابن عمى ع الغريب
حتى ف الأغانى..
وتشكيل لجنة من
عزت السماك
وعربى السباك
وأى فكهانى..
للبحث ف قضية الفسفور الأبيض
وتغير كوالين البوابات اللى ع المعابر
عشان المفاتيح إتسرقت
وجارى البحث عن الجانى..
ولإننا دول
كلها بتسكن ف البدروم
لازم نعمل حديد ع الشبابيك
ونكتر م البصل والتوم
لصد أى هجوم عدوانى..
ويتم دراسة فكرة عمل جمعية
وعزة تقبضها الأول
وتوجيه الشكر
لأصحاب السمو والفخامة والمعالى..
اللى تحملوا تكاليف دفن الموتى
واستخراج التصاريح
وصوان العزا
وتوفير جميع أنواع البن
المصرى واليمنى
والخليجى واللبنانى..
ويتم الاتفاق من دلوقتى
ها نتغدا فين المؤتمر اللى جاى
وأنا من هنا بعلنها بكل وضوح
مابحبش اللحمة الضانى..
موضوع: بدون تشطيب 
الأحد فبراير 01, 2009 1:04 am
