سرقة ..خطف ..اغتصاب..قتل ...احفظنا يارحم الراحمين ...

السلام عليكم ورحمة الله وبركاتهـ

النهاردة الموضوع مهم جدا
ركزوا الله يخليكم واقروا للاخر

ادخل فية عالطول

دلوقتي من كام يوم كنت بشوف برنامج علي المحور اللي هو صبايا (حقيقي البرنامج احيانا بيجيب مواضيع حلوة )
المهم
الموضوع كان عن المصــــــــــــــــايب اللي بتحصل للبنات في الشارع ياجماعة
يعني المذيعة اللي دايما بنسي اسمها دية جابت ناس اتثبتوا في الشارع (ولا مش اتعاكسوا يعني ) لالا بسلاح عشان يتاخد شنطهم وفلوسهم في حتت كتير في مصر (طبعا اكيد موجود برة مصر بس كلامي دلوقتي عن مصر وبس ) والبنات جايبة مرعوبة والغريب كان في اوقات مختلفة من النهار والليل
يعني مش مشكلة وقت اهية

وجابت ناس عيالهم مخطوفة (اللهم احفظنا يارب ) والبنات مختفية من شهور وياعيني اهلهم هيموتوا عليهم
ومنهم بنت اسمها اسماء نزلت درس والمفرزض ترجع 6 مارجعتش من 3 اشهر يعني بقي لها كتيررررر جدا وطبعا الشرطة في خدمة الشعب (قامت بواجبها كالمعتاد ..بس مش موضوعنا بقي ) المهم دية كانت حالة من عدة حالات يعني البنات بتتشد من الشارع والبنت كانت محجبة ياجماعة ولا لابسة لبس عريان ولا مستفز يعني

واللهم احفظنا جميعا جابت بقي بنات اغتصبوا وكان في بنت مع اخوها اساسا في الشارع الولد انضرب والبنت اتاخدت واغتصوبها يارب يجازيهم يارب باعمالهم ...ودية بردة حالة من حالات كتييييير (طبعا مش كل البلد بتغتصب يعني بس فعلا ظاهرة غريب جدا وكترت عن الطبيعي ) والله اعلم بقي الواحد هيرجع يخرج تاني ازاي من حالة الرعب اللي هو فيها

واخيرا بقي القتل ....البنت يخطفوها او يسرقوها او يغتصبوها ..وخلاص مش بترجع بقي بتتقتل ..(وطبعا الشرطة في خدمة الشعب زي ماقولت بس مش موضوعنا ) ارحمنا يارب واحفظنا


دلوقتي بقي
احنا نعمل اية
يعني انا كبنت مثلا مش هنزل كليتي واتحبس في البيت
ولا انزل بار بي جي اموت الشباب اللي اقابلهم خوفنا منهم ولا اية بقي
فعلا حالة رعب فظيعة بقيت تركبني كل اما عربية او ولد او اصلا قطة تعدي جنبي في الشارع مرعوووووبة هيحصلي اية (ومش ببقي نازلة اتفسح يعني ..عشان محدش يقولي خليكي في البيت .. في ضروريات ) انا دلوقتي كبنت لبسي مش ملفت ومحجبة ..اعمل اية اكتر من كدة بقي

والغريب الحوادث اختلفت فيها الظروف من حتة لحتة والنتايج واحدة
يعني بنت لابسة قالعة في حتة راقية ولالا اللي حصلها حصلها (احمينا يارب جميعا )

طيب ودلوقتي اية اللي هيحصل لو الحكومة جابت حبة من الامن المركزي اللي بيقف يعاكس دة
وحطيتهم في الشوراع بدل ماهما مش عارفه بجد اية دورهم (غير انهم يطلعوا وراء حضرة الضابط يشيلوا الحاجة ) حقيقي دورهم اية بقي ..لو حد يعرف يقولي ...
يعني اية اللي هينقص علي الحكومة بدل المصاااااايب اللي بتحصل والعائلات اللي بتتدمر والبنات اللي بتروح من غير ذنب دية (طبعا قضاء الله ومحدش يعترض ) ولكن حرام فعلا اللي بيحصل دة



اللهم ارحمنا برحمتك
واهدي امتك
واحفظنا يارب من شر الدنيا ومن فيها

ملاحظين اني بدعي كتير اوي صح
دا اسمة الرررررعب ياجماعة

ارجو التفاعل
ومحدش ينسي اني مااتكلمتش علي قلة الادب اللي بتحصل في المعاكسات اليومية اللي الناس قربت تتعود عليها وكانها امر عادي جدا وطبيعي (ودية مصيبة ) بس اتكلمنا فيها كتير وخلينا في انها عديت للتطاول بقي السرقة والاغتصاب والقتل والخطف (احفظنا ياررررب )


وارجو ان التفاعل يكون بهدوء
وارجوكم محدش يدخل يقولي غلط البنت
كتير من اللي حصلتلهم مصايب محجبين ياجماعة ولبسهم فعلا غير ملفت


ومعلش طولت عليكم
بس بجد موضوع مهم