كتب على سلامة ٤/ ٢/ ٢٠٠٩
سمعت بس طراطيش كلام
والسلام عليكم
عليكم السلام
بقيت بخاف أنام
أصحى على نفس الكابوس..
أنا شفت الخطر
لكن لما سألت عن الراجل
اللى بيدق الناقوس..
ناس تقول ده مات
وناس تقول محبوس..
ولما جانى ف المنام
سيادة القانون
قلت له فهمنى واحدة واحدة
كده بالمحسوس..
وقوللى يا مولانا
إمتى ف بلدنا
ها تتساوى الرووس..
لكن لما نزلت سوق الخضار
عرفت حقيقة العلاقة
بين الريس والمرؤوس..
وفهمت ليه إحنا لسه واقفين
عند مرحلة
يا ترى أحسن خافض للحرارة
الحقن
واللا اللبوس..
ولما اتفرجت
على مذبحة أنابيب الغاز
اتأكدت إن أهم إنجاز
لوزارة البترول
وجود تلات فرق ف الدورى
وحلم الفوز بكأس الكؤوس..
وسألت عن معنى كلمة
بتوجعنى من زمان
وماخلتش ولا قاموس..
سألت الدكتور مجدى
وفتحى الترزى
وحربى بياع العرقسوس..
لكن لما شفت ناس
بتفرط فى أمة بحالها
قلت الله يرحمك
ويسامحك بقى يامه
بقى عشان درجتين ف الكيميا
تقوليلى جتك ستين خيبة
يا ماوكوس..!!
موضوع: طراطيش كلام 
الأربعاء فبراير 04, 2009 1:12 am
